பெத்லஹேம் குடும்ப யூனிட் சினிமா விமர்சனம்

நடிகர்கள் :-
நிவின் பாலி – ஜஸ்டின்
மமிதா பைஜு – ஆஷ்லி
சங்கீத் பிரதாப் – ஜோயல்​
பிந்து பணிக்கர் – குஞ்சான்டி
சுரேஷ் கிருஷ்ணா – பைஜு எஸ்
வினய் சூஃபோர்ட் – அலெக்ஸ்
ஸ்ரிந்தா – ரேஷ்மா
ஷமீர் கான் – பிரிண்டோ
மீனாட்சி ரவீந்திரன் – ரியா
அயசங்கர் கரிமுட்டம் – தங்கச்சாஜ்
தங்கம் மோகன் – ரோசிலி
வெட்டுக்கிளி பிரகாஷ் – டேவிஸ்
தொழில்நுட்பக் குழு:-
இயக்கம் – கிரிஷ் ஏ.டி
தயாரிப்பாளர்கள் – திலீஷ் போத்தன், ஃபஹத் ஃபாசில், ஷ்யாம் புஷ்கரன்
இசை – விஷ்ணு விஜய்
எழுத்தாளர்கள் – கிரிஷ் யுனு, கிரண் ஜோசி
ஒளிப்பதிவு – அஜ்மல் சாபு
படத்தொகுப்பு – ஆகாஷ் ஜோசப் வர்கீஸ்
கலை இயக்கம் – ஆஷிக் எஸ்
டப்பிங் இயக்கம்: ஆர்.பி. பாலா
ஆடை வடிவமைப்பு – தன்யா பாலகிருஷ்ணன்
ஒலி வடிவமைப்பு – சங்கரன் ஏ.எஸ்., கே.சி. சித்தார்தன்
பாடல் வரிகள் – சுஹைல் கோயா, விநாயக் சசிகுமார்
சண்டைக் காட்சிகள் – சந்தோஷ்
தயாரிப்பு நிர்வாகி – ஜம்ஷீர் புரக்காட்டிரி
விஎஃப்எக்ஸ் – எக் வைட் விஎஃப்எக்ஸ்
நிர்வாக தயாரிப்பாளர்கள் – பென்னி கட்டப்பனா, ஜோஸ் விஜய்
மக்கள் தொடர்பு: யுவராஜ்
இயங்கும் நேரம்: 2 மணி நேரம் 37 நிமிடங்கள்

முண்டக்காயத்தில் வாழ்ந்துவந்த ஆஷ்லி (மமிதா பைஜூ), தனது மேற்படிப்பிற்காகத் பெற்றோர் மற்றும் தம்பியுடன் எர்ணாகுளத்தில் உள்ள கருகாட்டி பகுதிக்குக் குடிவருகிறாள். கல்லூரியில் ‘ரூம் 17’ எனும் இசைக்குழுவில் முதன்மை கிட்டார் கலைஞராக இருக்கும் அவளுக்கு, சொந்த ஊரையும் பழைய வீட்டையும் விட்டு வர மனமில்லை. அதேசமயத்தில், தந்தை தீவிர மதுப்பழக்கம் கொண்டவர் என்பதால், ஆஷ்லியும் அவளது தாயாரும் எப்போதும் ஒருவித அச்சத்தோடும் நிம்மதியற்ற நிலையிலுமே காலத்தைக் கழித்து வருகின்றனர்.புதிய சூழலில், எதிரே இருக்கும் வீட்டைச் சேர்ந்த ஜஸ்டின் (நிவின் பாலி) என்பவரை ஆஷ்லி பார்க்கிறாள். முப்பது வயதைக் கடந்தும் திருமணம் செய்யாமல் வாழும் ஜஸ்டின், அக்கம் பக்கத்தினருக்கு மிகவும் பிரியமானவர். சொந்தமாக கேட்டரிங் தொழில் நடத்திவரும் அவர், தம்பி ஜோயல் (சங்கீத் பிரதாப்) உருவாக்கும் குறும்படங்களுக்கும் பக்கபலமாக இருக்கிறார். கடந்த காலத்தில் நேர்ந்த ஒரு துயரமான சம்பவத்திற்குப் பிறகு, சுற்றியுள்ள அனைவருக்கும் உதவும் ஒரு முதிர்ச்சியான மனிதராக அவர் வலம் வருகிறார்.தொடக்கத்தில் ஜஸ்டின் ஒருவரை மிரட்டும் காட்சியைக் காணும் ஆஷ்லி, அவர் தவறானவர் என நினைக்கிறாள். ஆனால், அவளது கிட்டாரின் கம்பி அறுந்துபோகும் வேளையில் ஓடோடி வந்து உதவும் தருணத்திலிருந்தும், அவளது மனச்சுமையைப் புரிந்துகொள்ளும் போக்கிலிருந்தும் ஜஸ்டினின் தூய்மையான அன்பை உணர்கிறாள். குடும்பப் பொறுப்பற்ற தந்தையைப் பார்த்தே வளர்ந்த ஆஷ்லிக்கு, ஜஸ்டினின் பொறுப்புமிக்கப் பண்பு பெரும் ஈர்ப்பை ஏற்படுத்தி, அது ஆழமான காதலாக உருவெடுக்கிறது. இருவருக்கும் இடையே 12 முதல் 13 ஆண்டுகள் வரை வயது இடைவெளி இருக்கிறது. அதேவேளை, இருவருக்குள்ளும் இருக்கும் இசை ஆர்வமும் அவர்களைப் பிணைக்கிறது. ஆஷ்லி தன் அன்பை வெளிப்படுத்தும்போது, தனது வயது, ஊராரின் பேச்சு மற்றும் ஆஷ்லியின் குடும்பக் கட்டுப்பாடு ஆகியவற்றைக் கருத்தில் கொண்டு ஜஸ்டின் ஆரம்பத்தில் காதலை ஏற்க மறுத்து ஒதுங்கி விலகினாலும், அவளது உண்மையான அன்பைப் புரிந்து கொள்கிறான். காரில் செல்லும் ஒரு பயணத்தின் போது, ஆஷ்லி தன் காதலை வெளிப்படுத்த, ஜஸ்டினும் அதை ஏற்றுக்கொள்கிறான். பிறகு குடும்பத்தினருக்கும் காலனி மக்களுக்கும் தெரியாமல் இருவரும் ரகசியமாகக் காதலிக்கத் தொடங்குகிறார்கள்.இந்நிலையில், ஜஸ்டினின் தம்பி ஜோயலுக்கு அவனது காதலியின் சகோதரரால் பிரச்சனை வருகிறது. ஆஷ்லியின் மாமா அலெக்ஸ் (வினய் ஃபோர்ட்), ஆஷ்லியின் நடவடிக்கைகளில் சந்தேகமடைந்து கண்காணிக்கத் தொடங்குகிறார். ஒரு கட்டத்தில், இவர்களது ரகசியக் காதல் குடும்பத்தினருக்குத் தெரியவருகிறது. ஆஷ்லியின் தாய் உணர்ச்சிப்பூர்வமாகப் பேசி ஆஷ்லியை அயர்லாந்திற்குப் படிக்க அனுப்பி வைக்கிறார். ஜஸ்டினும் வயது வித்தியாசம் மற்றும் குடும்பச் சூழ்நிலை கருதி அமைதியாக, ஆஷ்லியும் அயர்லாந்துக்குச் சென்றுவிடுகிறாள்.இரண்டு ஆண்டுகள் கழித்து அயர்லாந்திலிருந்து திரும்பி வரும் ஆஷ்லி, ஜஸ்டின் வேறு ஒரு பெண்ணைத் திருமணம் செய்யப்போவதாக நினைக்கிறாள். ஆனால், அந்தத் திருமணம் ஜஸ்டினுடையது அல்ல, காலனியில் உள்ள வேறொருவரது திருமணம் என்பது தெரியவருகிறது. அதன்பின் என்ன நடந்தது என்பதே படத்தின் மீதிக்கதை.

நிவின் பாலி திரையில் தோன்றும் முதல் காட்சியிலிருந்தே ஜஸ்டின் கதாபாத்திரத்திற்குத் தேவையான முதிர்ச்சியையும், அதேசமயத்தில் இயல்பான நக்கலையும் மிகத் துல்லியமாக வெளிப்படுத்தியுள்ளார். முப்பதுகளைக் கடந்த ஒரு நபர் சந்திக்கும் சமூக நெருக்கடிகளையும், கடந்தகாலச் சுவடுகளால் எழும் தயக்கங்களையும் தனது ஆழமான சைகைகள் மற்றும் பார்வையாலேயே நேர்த்தியாகக் கடத்துகிறார். குறிப்பாக, கதாநாயகியின் காதலை ஏற்க முடியாமல் தவிக்கும் தருணங்களிலும், தம்பியின் சிக்கல்களைப் பக்குவமாகக் கையாளும் இடங்களிலும் அவரது அனுபவமிக்க நடிப்பு மிளிர்கிறது. கதாபாத்திரத்திற்குள் இருக்கும் அமைதியான தன்மையும், டைமிங் நகைச்சுவையும் ரசிகர்களைக் கவரும் வண்ணம் அமைந்திருந்துள்ளது.

ஆஷ்லி எனும் துடிப்பான கல்லூரிப் பெண்ணின் மனவோட்டங்களை மிக இயல்பாகத் திரையில் பிரதிபலித்துள்ளார் மமிதா பைஜு. குடும்பச் சூழலால் ஏற்படும் மன அழுத்தத்தை ஒருபுறமும், இசையின் மீதான ஆர்வத்தையும் வயதில் மூத்தவர் மீதான காதலையும் மறுபுறமும் காட்டும் இடங்களில் தனது துல்லியமான முகபாவனைகளால் கைதட்டல் பெறுகிறார். முக்கியமாக, நாயகனிடம் உரிமையோடு பேசும் சுவாரஸ்யமான தருணங்களிலும், கிட்டார் வாசிக்கும் காட்சிகளிலும் தனித்துவமான ஈர்ப்பை ஏற்படுத்துகிறார்.

படத்தில் முதன்மை ஜோடியைத் தாண்டி, கதையின் போக்கிற்கு வலிமை சேர்க்கும் துணைப் பாத்திரங்களின் பங்களிப்பு மிகவும் குறிப்பிடத்தக்கது. ஜஸ்டினின் தம்பியாக வரும் சங்கீத் பிரதாப் (ஜோயல்), குறும்பட இயக்குநரின் பரபரப்பையும் இளமைத் துள்ளலையும் தனது இயல்பான பாடி லேங்குவேஜ் மூலம் எவ்வித அநாயாசமும் இன்றித் திரையில் கொண்டுவந்து நகைச்சுவை அலைகளை உருவாக்குகிறார். பிந்து பணிக்கர் (குஞ்சான்டி) தனது அனுபவமிக்க நடிப்பால் குடும்ப மூத்த உறுப்பினருக்கே உரிய அதிகாரத்தையும் தோரணையும் கலந்த நகைச்சுவையை அள்ளிக் கொடுக்க, சுரேஷ் கிருஷ்ணா (பைஜு எஸ்) பழமைவாத எண்ணங்கள் கொண்ட அண்டை வீட்டாராகத் தோன்றி தனது டைமிங் கவுண்டர்களால் அரங்கை அதிர வைக்கிறார்.

கதாநாயகியின் மாமனாக வரும் வினய் ஃபோர்ட் (அலெக்ஸ்), குடும்பத் தலைவன் போல நடித்தபடி காட்டும் தேவையற்ற சந்தேகப் பார்வையாலும், கோவா காட்சிகளில் செய்யும் கலாட்டாக்களாலும் தனித்து நிற்கிறார். ஸ்ரிந்தா (ரேஷ்மா) குடியிருப்புப் பகுதிப் பெண்களின் எதார்த்தமான அரட்டைகளையும் சுவாரஸ்யங்களையும் தனது இயல்பான பேச்சுவழக்கில் பிரதிபலிக்க, ஷமீர் கான் (பிரிண்டோ) மற்றும் மீனாட்சி ரவீந்திரன் (ரியா) ஆகியோர் இளவட்டக் கதாபாத்திரங்களுக்குத் தேவையான சுறுசுறுப்பையும், துடிப்பான நகைச்சுவை இணைப்பையும் கச்சிதமாக வழங்கியுள்ளனர். மேலும், ஜெயசங்கர் கரிமுட்டம் (தங்கச்சன்) தனது கட்டுக்கோப்பான கிராமத்து மனிதரின் சாயலைச் சரியாக வெளிப்படுத்த, தங்கம் மோகன் (ரோசிலி) தாய்மையின் பாசத்தையும் கவலையையும் இயல்பாகப் பிரதிபலிக்கிறார். அனைத்திற்கும் மேலாக, வெட்டுக்கிளி பிரகாஷ் (டேவிஸ்) குடும்பத்தின் வயதான உறுப்பினராக வந்து, தனது எதார்த்தமான உடல் மொழியினாலும் அழுத்தமான வசன உச்சரிப்பினாலும் படத்தின் பல காட்சிகளுக்கு அழகான உணர்வுப்பூர்வமான அடித்தளத்தை அமைத்துக் கொடுத்துள்ளார்.

தன்னுடைய புதுமையான ஒலிச்சேர்க்கை மற்றும் ஆழமான மெட்டுகளின் மூலம் திரைக்கதைக்கு மாபெரும் புத்துணர்ச்சியை அளித்துள்ளார் இசையமைப்பாளர் விஷ்ணு விஜய். கதாபாத்திரங்களின் உள்மன உணர்வுகளையும் மென்மையான காதல் அலைகளையும் மிகத் துல்லியமாக வெளிக்கொணரும் பின்னணி இசையும், ஆன்மாவைத் தீண்டும் பாடல்களும் கதைக்கு மாபெரும் வலிமை சேர்த்துள்ளன.

ஒளிப்பதிவாளர் அஜ்மல் சாபு, திரையின் ஒவ்வொரு அமைப்பையும் மிகுந்த கலைநயத்தோடும், கண் கவரும் அழகிய வண்ணக் கலவையோடும் செதுக்கியுள்ளார். அந்த குடியிருப்புப் பகுதியின் இயற்கையான அழகையும், மாந்தர்களின் முகத்தில் தோன்றும் நுட்பமான உணர்ச்சி மாற்றங்களையும் தனது லென்ஸ் வழியே மிகவும் நுணுக்கமாகப் பதிவு செய்துள்ளார்.

படத்தொகுப்பாளர் ஆகாஷ் ஜோசப் வர்கீஸ், திரைக்கதையின் ஓட்டத்தை சீராகக் கட்டுப்படுத்தி, பார்வையாளர்களின் கவனத்தை எங்கும் சிதறவிடாமல் கதையோடு பிணைத்து வைத்திருக்கிறார். நகைச்சுவை உரையாடல்களுக்கான சரியான கத்தரிப்புகளும், உணர்வுப்பூர்வமான தருணங்களில் பயன்படுத்திய நவீன தொகுப்பு நுட்பங்களும் படத்தின் ஒட்டுமொத்த அனுபவத்தை மேலும் மிளிரச் செய்துள்ளன.

திரைக்கதையில் பெரிய அளவிலான செயற்கை திருப்பங்களோ அல்லது பிரம்மாண்டமான காட்சிகளோ இல்லாமல், மிக எளிய மனிதர்களின் இயல்பான உரையாடல்களிலிருந்தே பார்வையாளர்களைத் தொடர்ந்து ரசிக்க வைக்கும் வித்தையை இயக்குநர் கிரிஷ் ஏ.டி மீண்டும் ஒருமுறை மிகச் சிறப்பாகச் செய்து காட்டியுள்ளார். வயது வித்தியாசம் கொண்ட ஒரு நுட்பமான காதல் கதைக் கருவை எடுத்துக் கொண்டு, அதைச் சமூகத்தின் விமர்சனப் பார்வைகளுக்கோ அல்லது கிசுகிசுப்புகளுக்கோ இடமளிக்காத வகையில் மிகவும் கண்ணியமாகவும், மனதை நெகிழ வைக்கும் தருணங்களாகவும் மாற்றி அமைத்திருப்பது இவரது திரைக்கதை உருவாக்கத்தின் முதிர்ச்சியைக் காட்டுகிறது. ஒவ்வொரு துணைப் பாத்திரத்திற்கும் ஏற்ற தனித்துவமான குணாதிசயங்களை வடிவமைத்து, காட்சிக்குக் காட்சி நகைச்சுவை வெடிப்புகளை தங்கு தடையின்றி உருவாக்கியுள்ள விதத்தில் இவரது இயக்கம் மிளிர்கிறது. கதாபாத்திரங்களின் மனப்போராட்டங்களை மிக இயல்பாக வெளிக்கொணர்ந்து, பார்வையாளர்களை கதையின் உணர்வோடு ஒன்றிணையச் செய்ததில் ஒரு சிறந்த கதைசொல்லியாகத் தனது முத்திரையை ஆழமாகப் பதித்துள்ளார்.